Job 10

Iobu ese iena mauri totona ia hesiku

1 Iobu ma ia hereva, ia gwau,

“Egu mauri ena namo lau laloa lasi,
lau hesikulaia noho.
Unai dainai egu maumau do lau gwauraia hedinarai noho.
Egu lauma ena mamina ia dika dainai do lau maumau.
2 Dirava dekenai do lau hereva, do lau gwau:
Lau do oi gwauraia kerere lasi,
to oi ese oiemu samani hereva ena badina korikori,
be lau dekenai mani do oi hadibaia.
3 Lau do oi dagedage henia be ia namo, a?
Oi ese oi karaia gauna,
be do oi negea be ia maoro, a?
Bona kara dika taudia edia laloa dekenai oi moale noho, a?
4 Oiemu matana be hidio, a?
Taunimanima ese idia itaia hegeregerena,
be oi itaia noho, a?
5 Oiemu dina be taunimanima edia dina bamona, a?
Oiemu lagani be taunimanima edia lagani hegeregerena, a?
6 Bona unai dainai sedira egu kara kerere oi tahua noho,
bona egu kara dika oi tahua masemase, a?
7 To oi diba lau be kerere lasi.
Bona oi diba danu,
ta ese oiemu imana dekena amo lau ia hamauria diba lasi.

8 “Oiemu imana ese lau ia karaia,
bona egu toana danu oi henia,
to harihari unai oiemu imana ese,
lau idia hadikaia ore noho.
9 Do oi laloatao,
oi ese raro dekena amo lau oi karaia.
Harihari oi ese kahu dekenai ma lau do oi halaoa, a?
10 Oi ese egu tamana dekenai goada oi henia,
ia ese lau ia havaraia.
Oi ese egu sinana ena bogana dekenai lau oi havaraia.
11 Oi ese egu tauanina,
be turiana bona varovarona dekenai oi karaia,
bona egu turiana be kopina bona hidiona dekenai oi koua.
12 Lau dekenai mauri oi henia,
bona oi ese lau oi lalokau henia vadaeni danu.
Oi ese lau oi naria dainai,
egu lauma ia mauri noho inai.

13 “To harihari lau diba,
inai bamona oi karaia,
be hunia dekenai lau do oi hadikaia totona.
14 Bema kara dika lau karaia neganai,
oi ese unai kara do oi itaia namonamo noho,
bona unai egu dika do oi gwauatao lasi.
15 Bema kara dika lau karaia neganai,
oiemu vairanai lau be kerere momokani.
To bema lau kara maoromaoro,
hanamoa ta lau davaria lasi.
Momokani egu lalona ia hisihisi,
bona lau hemarai bada noho.
16 Bema nega ta lau kwalimu neganai,
oi ese, laiona bamona, lau oi lulua,
bona hoa kara danu oi karaia noho,
lau do oi hadikaia totona.
17 Samania taudia ma oi mailaia,
lau do oi hamorua totona.
Oiemu badu be lau dekenai oi habadaia noho,
bona lau oi hadikaia totona,
tuari orea matamatadia oi siaia mai.

18 “Dirava e,
badina dahaka egu sinana ena bogana dekena amo,
lau oi abia murimuri dekenai?
Tau ta ese lau do itaia lasi neganai lau mase be namo.
19 Mauri ena mamina bema lau abia lasi be namo,
to bogana dekena amo, maoromaoro lau mase,
bona mase guria gabuna lalonai lau idia atoa be namo.
20 Egu mauri dinadia be kahirakahira idia ore, ani?
Mani lau do oi rakatania,
vadaeni egu mauri do noho nega sisina lalonai do lau moale diba.
21 Badina lau be kahirakahira do lau lao,
bona do lau giroa mai lasi momokani.
Dibura masemase gabuna dekenai do lau lao.
22 Unai gabu be hanuaboi momokani bamona,
daradara gabuna.
Unai gabu ena diari be dibura bamona.”